Istorya Ni Jay Cupas, CST-R Batch 2018 (Ang labing unang batch sa CST-R SHS)
Mga hulagway Ni Rheyxs Fernandez
Mao kini ang sugilanon sa akong paglampos sa pagtungha sa senior high school.
Una, naay pari nga miistorya nako bahin sa kon asa ko mo-eskwela og senior high school. Mitubag ra ko nga, “Sa Julio ra guro ko, Father.” Si Fr. Alve ang maong pari ug gisultian ko niya nga, “Kon ganahan ka sa Sto. Tomas (CST-R) mo-eskwela, ingna ra ko kay kuhaon ti ka.”
Mitubag ra ko nga, “Sige, father, hunahunaon usa nako.”
Wala gyod ko makasiguro sa akong desisyon. Gipangga man usab nako ang pampublikong tunghaan nga akong gisudlan sukad sa Grade 7 pa ko.
Usa na ka semana ang milabay unya nakadesisyon na ko nga mobalhin sa Sto. Tomas apan dili gyod 100 ka porsyento akong desisyon niadtong higayunan nga sa bag-ong tunghaan na ko mo-enroll.
Sa akong unang pagtungha sa CST-R, na-culture shock ko tungod kay sa tinud-anay lang wala ko maanad nga magsige og klase ang mga maestro ug maestra. Pagkahuman sa unang semester, miduol ko kang Sir Cuico ug nakighinabi kaniya kon mahimo bang mobalik ko sa pampublikong tunghaan kay naglisod ko sa klase ug tungod sa culture shock.
“Kon mobalik ka didto, usik kaayo imong oportunidad kay scholar ka diri. Ayaw usiki ang oportunidad nimo kay mao ni ang makapahuman nimo og eskwela ug ayaw kabalaka kay naa ra mi sa tapad nimo nga mahimo nimong maistorya ug makatabang nimo aron makahuman ka og eskwela. Maanad ra ka puhon diri sa Sto. Tomas.”
Tungod ato wala ko nidayon pagbalik sa kanhi nakong eskwelahan. Nagsugod ang second semester. Nag-anamanam pod ang akong nabatyagang kalipay ug kahinam kay nakahuman kog Grade 11. Didto na ko mi-decide nga 100 porsyento na kong sa Sto. Tomas nako humanon ang akong senior high school kay naganahan ko sa maayong pagtratar nila sa akoa, ilabi na ang mga pari ug mga teachers.
Grade 12 na ko. Apan hapit ko na kick-out kay nagdala ko og ilimnon sulod sa eskwelahan. Nadala nako ang akong pagkabugoy sauna. Didto na ko nakamata sa dakong kamatuoran nga dili angay nga akong usikan ang nahibiling tuig nako sa Sto. Tomas kay basi og dili na hinuon ko makahuman og eskwela.
Makasulti gyod ko nga wala ko magmahay nga sa Sto. Tomas ko ning-graduate kay ang mga tawo nga akong nakahimamat didto mga maayong tawo. Usa na nila si Fr. Alve kay kon dili pa tungod niya dili usab ko makatungha sa college. Tingali, tambay ra ko karon kon wala ko gitabangan ni Fr. Alve. Kon dili pa pod tungod ni Sir Cuico ug sa iyang tambag nako, dili pod unta ko makamata bahin sa kaanindot sa CST-R.
Alang kanako, ang Sto. Tomas ang nagpabag-o sa akong kinabuhi bilang usa ka student-athlete. Dako gyod akong pagpasalamat sa mga mitabang nako ug sa mga maestra nga mitudlo kanamo. Kon dili pa tungod sa mga maestro, maglisod gyod mi karon sa college.
CST-R ang nakapabag-o sa akong pagkabugoy ug ang naghatag og dalan aron ko makaabot sa college. Sa sunod nga tuig tingtungha, third year college na ko ug padayon nakong giampo ang walay undang blessings para sa Sto. Tomas, sa mga pari ug sa kanhi nako mga teacher.
Kini ang akong “Istorya sa Sto. Tomas.”
Editor’s note:
This is the first submission for the 80 ka mga Istorya sa Sto. Tomas program for CST-R’s Ruby Anniversary. We are accepting stories in three languages: English, Filipino and Sinugbuanong Binisaya. The deadline is extended to April 10, 2020. Send your entries to [email protected].
